Açıqlama: Qırımtatar tilini ögretüv usulları ve vastalarnıñ çeşitligine ve çoqluğına rağmen adiy vatandaşlar ne yazıq ki, anatilni menimsep olamaylar ve turmuşta, kündelik yaşayışta anatilni yeterli derecede qullanıp olamaylar.İlim ve edebiyatnıñ nisbiy inkişafınen beraber, bilhassa soñki yıllarda çeşitli media-vastalarnıñ ilerilevi ve yayğınlığı, qırımtatar tilini ögrenmek içün ğayet çeşitli ve qolaylı yollar yarattı, ancaq buña baqmadan yetişken qırımtatarlar arasında anatilni qullanuvda bir artma köz etilmey.Olar içün, er kün, er vaziyette qullanmağa imkân bergen, em de qolayca ve tez bir şekilde menimsengen sade laqırdı tilni işletip çıqarmaq ve ögretmek mümkünmi? Bunıñ içün ne yapıla bilir ve nasıl usullar ile vastalar qullanıla bilir?
Tögerek masada muzakere içün teklif etilgen meseleler:● Anatilini kündelik yaşayışta qullanğan (qullanabilgen) vatandaşlarnıñ nisbiy sayısınen bağlı belgisizlikler;● Umumiy olaraq halq arasında til seviyesini belgilev yolları, tasnifi ve talili;● Oquv yurtlarında başarılı olğan ögretüv usullarnı belgilev ve bularnı yetişkenler içün uyğunlaştıruv ve ameliyatqa keçirüv;● Oquv yurtları tışında anatilni ögretüv usulları ve şekilleri. Bularnıñ neticelerini talil etüv;● Eñ temel seviyede, qısqa ve sade cümleler ile adiy ibarelerni qullanaraq laqırdı etebilmek içün kerekli hususlar;● Laqırdı tilinde eñ sıq rastkelgen rus söz ve ibarelerniñ qırımtatar tilinde qarşılığı ve qullanuvı;● Edebiy ve laqırdı tilleri arasındaki farqlarnıñ ögrenüv ceryanına tesiri;● Laqırdı tilinde azır modeller ve sıq qullanılğan qalıplarnıñ aşlanması;● Telâffuz bozuluvlarnı tüzetüv yolları;● Anatilni ögrenmek ve menimsemek içün teşviqat.
Tögerek masanıñ qaideleri: ●  İştirakçilerniñ maruzaları 7 daqqadan ziyade olmamalı; ● Cevaplar ve izaatlar 3 daqqadan ziyade olmamalı;● Çıqışlar ve sualler içün belgilengen sırağa riayet etmeli;● Toplaşuvnıñ mevzusınen bağlı olmağan çıqışlar moderator tarafından her ande toqtatılabilir; ● Her türlü haqaret ve qabaatlav yasaqtır. Moderator bu qaidege riayet etmegen iştirakçini uzaqlaştırma aqqında sahip.● Tögerek masa "Chatham House" qaideleri boyunca alıp barılacaq: müzakere açıq ve her türlü fikirni beyan etmek serbesttir, lâkin toplaşuvdan soñra kimniñ ne aytqanı açıqlanmaz. Sadece umumiy olaraq ne müzakere etilgeni aqqında ikâye etmege mumkün.
Tögerek masada iştirak etmek istegenler mektüplerini ve maruzalarını gro.ilitmiriq%40votema.afatsum adresine yazabileler. Ya da facebook.com/mustafametov Facebook saifesi üzerinden müracaat etebileler.
Qırım'dan Zoom vastasınen iştirak etmek istegenler, tahallüs qullanıp ve video kameranı qapalı tutıp gizli diñleyici olaraq qoşulabileler. Bunıñ içün tahallüsnı elektronik mektüp ile evelden bildirmege rica etemiz. Bu şekilde müracaat etkenlerniñ şahsiy bilgileri gizli qalacaqtır.

Birligimizniñ logosı dörtkenarlı bir şekildir. Bu, qadimiy devirlerden bugünki künge qadar bilgini yetkizgen özgün bir şekilni temsil ete. Bunıñ ilham menbası, Türkiy tillerniñ eñ qadimiy abidesi - Kül Tigin Kitabesi oldı. Orhon özeni yanından bulunğan ve dörtkenar şekilindeki taştan yasalğan bu abidede köktürkçe elifbesinen oyulğan yazılar yer almaqta. Orhon yazıları dep adlandırılğan bu abide, qırımtatar tilniñ ecdadı sayılğan qadimiy türk tiline ait eñ eski abide olaraq qabul etilmekte. Yazılı bilgilerni taşığan vastalar adet üzre dörtkenar şekilinde yasalğan, ve bugünde-bugün bu vastalar sadece kitap ya da defter saifelerinen sıñırlı qalmay, çeşitli malümatnı elde etmek içün qullanılğan elektronik aletlerniñ ekranları şekilinde de ögümizge çıqa.

Bundan ğayrı İslâm medeniyetinde ibadethanelerniñ ve oquv yurtlarnıñ mimariyetinde birçoq unsurlar dörtkenar şekilindedir. Hat yazısınen bezetilgen camilerniñ ve türbelerniñ kiriş qapıları, mihraplar, minberler em bilgi taşımaqta, em de Qıbla tarafını köstermektedir.